Sítrónukaka með ólífuolíu

Sítrónur eru í uppáhaldi hjá mér og þá sérstaklega köldu vetrarmánuðina. Þessi dásamlega sítrónukaka er fljótleg og frískandi. Hún er mjög góð með tesopa en líka bara frábær hvunndagskaka við allskonar tilefni. Mér finnst svo frábært og mikil tilbreyting að nota ólífuolíu í köku í staðin fyrir að nota smjör, hún verður svo mjúk og góð.

180 g hveiti

2 tsk. lyftuduft

½ tsk. salt

200 g sykur

3 stór egg

2 tsk. appelsínubörkur

2 tsk. sítrónubörkur

60 ml (rúmur ½ dl) mjólk

170 ml (1 ¾ dl) ólífuolía

Stillið ofninn á 180°C (170°C blástur). Setjið hveiti, lyftiduft og salt í skál og blandið saman. Hrærið egg og sykur saman þar til létt og ljóst. Bætið báðum tegundum af berki, mjólk og ólífuolíu út í og hrærið 1-2 mín. Bætið hveiti út í og hrærið saman í 1-2 mín. Setjið pappír á botninn á 22-24 cm smelluformi og jafnið deiginu í formið. Bakið í 30-35 mín. Ef þið leggið fingurna laust ofan á miðjuna á kökunni og þið finnið að hún er stíf þá er hún bökuð. Kælið kökuna í 5 mín og takið hana síðan úr forminu og setjið á kökudisk. Kælið áfram og dreifið síðan glassúr ofan á, rífið svolítið af sítrónubörk ofan á kökuna.

Glassúr:

150 g flósykur

sítrónusafi eftir þörfum (u.þ.bl. 1 sítróna)

½ tsk. rifin börkur af sítrónu

Sigtið flórsykur í skál. Notið písk og hellið sítrónusafa út í þar til þið fáið þykkan glassúr.