Biskotti

Biskotti þáttur var fyrsta verkefni mitt á Gestgjafanum. Þátturinn var í kökublaði sem kom út árið 2006 og var mjög gaman að vinna það. Hér er uppskriftin, þessar hafa verið bakaðar hér heima ansi oft og gjarnan gefnar sem matargjöf. 

24-26 stk.

300 g hveiti, gjarnan 00 pitsahveiti, annars bara þetta venjulega

120 g sykur

50 g 3 tegundir af hnetum, samtals 150 g eða blanda af hnetum og trönuberjum

2 stór egg

1 eggjarauða

2 tsk. vanilludropar

150 g súkkulaði til að hjúpa með ef vill. 

Hitið ofninn í 180°C eða 160°C á blæstri. Setjið öll þurrefni í eina skál og sláið eggin saman með vanillunni í annari. Blandið þessu saman og hnoðið í samfellt deig. Setjð bökunarpappír á ofnplötu og mótið hleif um 10x35 cm stóran. Það er gott að nota blauta fingur. Bakið hleifinn í 25-30 mín, hann á að vera bakaður í gegn. Setjið hann á skurðarbretti og skerið hann í þunnar sneiðar, rúmlega 1 cm þunnar. Raðið þeim á bökunarplötuna og bakið aftur í um 10-15 mín eða þar til þær eru farnar að taka lit.

Það er ekki nauðsynlegt að dýfa þeim í súkkulaði en hér er samt aðferðin.

Bræðið súkkulaði og dýfið neðri helmingnum á kökunum í það. Látið kólna, gott að láta þær standa við glugga.