Ítölsk möndlukaka

Ítölsk og gómsæt er það kemur upp í hugann þegar þú smakkar þessa látlausu köku. Auðvitað verður þú samt að elska möndlur eins og ég. Ítalir eru snillingar í kökugerð með möndlum og það er alltaf eitthvað yndislegt og hversdagslegt við þeirra kökur. 

4 stór egg, aðskilin

150 g sykur

1 appelsína, fint rifinn börkur og safi

120 ml (1 ¼ dl) ólífuolía

1/8 tsk. möndludropar

300 g möndlumjöl

½ tsk. lyftiduft

40 g möndluflögur

Flórsykur til að sigta yfir

Hitið ofninn í 180°C. Stífþeytið eggjahvítur í skál, setjið til hliðar. Setjið sykur og eggjarauður í skál og þeytið saman þar til létt og ljóst. Bætið appelsínuberki, appelsínusafa, ólífuolíu og möndludropum út í og blandið vel.

Blandið möndlumjöli og lyftidufti saman í skál og bætið út í. Hrærið saman þar til samlagað. Bætið eggjahvítum út í og blandið varlega saman við. Klæðið 22 cm form með bökunarpappír og hellið deiginu í formið. Stráið möndluflögum yfir. Bakið kökuna í 40 mín. Kælið hana svolítið, losið um barmana og setjið kökuna á tertudisk. Sigtið flórsykur yfir og berið fram.