Baby Ruth kaka

Baby Ruth kaka var í öllum tertuboðum hér á árunum 1980 - 1990. Þessi kaka var uppáhald margra á mínu heimili og alltaf bökuð fyrir afmæli. Þá var rjóma sprautað utan um hana allan hringinn með rjómasprautu, það var tískan í þá daga. Salthneturnar eru feitar og það borgar sig ekki að mala þær í matvinnsluvél því þá losnar of mikið af fitunni úr þeim og fellir marensinn. Best er að nota poka og lemja á þær til að mala þær gróft. 

Kökubotnar:

3 eggjahvítur

260 g sykur (3 dl)

2 ½ dl saltmöndlur

20 stk Rits-kex

1 tsk. lyftiduft

1 tsk. vanilludropar

4 dl rjómi, þeyttur

Hitið ofninn í 190°C, 180°C á blástur. Setjið bökunarpappír í botnin á 2x 24 cm lausbotna formum. Þeytið eggjahvítur og sykur saman í hreinni skál þar til blandan verður hvítur massi, þetta tekur u.þ.bl. 6-8 mín.

Setjið salthnetur í plastpoka, (ég nota zip-lock poka) lemjið ofan á pokann með kökukefli þar til hneturnar eru gróft malaðar. Setjið þær í skál. Saxið eða myljið Ritz-kexið og bætið út í hneturnar.

Stráið lyftidufti og hellið vanilludropum út í marensinn og blandið saman við með sleikju. Bætið hnetublöndunni út í og blandið varlega með sleikju, passið að ofhræra ekki. Skiptið nú blöndunni í formin og bakið í 20 mín. Kælið botnana og leggið síðan saman með þeyttum rjóma. Smyrjið kreminu ofan á og passið að það sé farið að stífna svolítið svo það leki ekki út um allt.

Krem ofan á:

50 g smjör

100 g súkkulaði

3 eggjarauður

60 g flórsykur

Bræðið smjör og súkkulaði í vatnsbaði við vægan hita, má líka bræða í örbylgjuofni. Þeytið eggjarauður og flórsykur vel saman svo verði létt og ljóst. Hellið súkkulaðiblöndunni út í eggjamassann og þeytið vel saman. Kælið svolítið þar til stífnar.