Boston cream pie

Ég uppgvötaði þessa köku þegar ég var að gera þátt um amerískar köku og brauðuppskriftir fyrir Gestgjafann. Hún er uppáhald barnanna minna og oft beðið um hana í afmæli. Botnarnir eru ljósir og mjúkir og kremið er dásamlegt vanillukrem. Algjör dásemd þessi kaka. 

Kakan:

2 stór egg

140 g sykur

150 g hveiti

1 tsk. lyftiduft

¼ tsk. salt

1 dl mjólk

4 msk. smjör

1 tsk. vanilluextrakt eða 2 tsk. Vanilludropar

Hitið ofninn í 180°C. Þeytið saman egg og sykur. Sigtið saman hveiti og lyftiduft í skál og bætið salti út í. Bræðið smjörið í mjólkinni við vægan hita. Setjið hveiti út í eggjablönduna og hrærið saman með sleikju, bætið volgri mjólkurblöndunni út í ásamt vanillu. Hellið í smjörpappírsklætt smelluform 24 cm á breidd. Bakið í 25-30 mín. Kælið botninn á rist.

Fylling:

4 ½   dl rjómi

½  dl mjólk

1 kanelstöng

1 vanillustöng

50 g sykur

4 eggjarauður

Hitið ofninn í 160°C, setjið stóra ofnskúffu í hann, sjóðið fullan ketil af vatni  og hellið því í botninn á henni  Setjið rjóma og mjólk í pott. Skerið vanillustöng í tvennt eftir endilöngu og skafið kornin innan úr og bætið þeim í rjómablandið ásamt stönginni, kanilstönginni og sykri, hitið að suðu og látið bíða í 10 mín. Hrærið eggjarauður saman, hellið rjómablandinu út í rauðurnar gegnum sigti og hrærið vel saman. Hellið blöndunni í 24 cm breitt pæform og bakið í vatnsbaðinu í 20-25 mín eða þar til stífnað.  Kælt.

Ofan á:

½ dl rjómi

80 g súkkulaði

Hitið rjómann í litlum potti og bræðið súkkulaðið í rjómanum við vægan hita. Kakan er sett saman þannig. Kljúfið botnana í sundur með beittum hníf svo þið fáið tvo jafna botna. Setjið neðri botninn á kökudisk. Jafnið fyllingunni á botninn, það er ágætt að nota skeið. Setjið efri botninn ofan á og smyrjið súkkulaðihjúpnum yfir. Það er ekki gott að frysta kökuna tilbúna en botnana má gera fyrirfram og frysta þá.