Súkkulaðikaka með bananakremi

Hér er uppskrift að vinsælli köku sem gekk gjarnan undir nafninu kakan með ljóta kreminu. Bananinn skilur sig svolítið frá smjörblöndunni og verður skrítinn en bragðið af kreminu er þó undurgott. Þetta er kaka sem margir þekkja og ef ekki er tími til komin að kynnast henni. 

10 sneiðar

130 g smjör, mjúkt

280 g sykur

2 egg

1 tsk. vanilludropar

200 g hveiti

½ tsk. lyftiduft

1 tsk. matarsódi

40 g kakó

2 ½ dl mjólk

Hitið ofninn í 180°C. Hrærið smjör og sykur saman þar til það er ljóst og kremkennt. Bætið eggjum út í einu í einu og síðan vanilludropum og hrærið allt vel saman. Sigtið hveiti, lyftiduft, matarsóda og kakó saman og bætið út í ásamt mjólk, fyrst helmingnum og síðan öllu. Smyrjið 2 lausbotna kökuform 24 cm breið og skiptið deiginu á milli þeirra. Bakið botnana í 20 mín í miðjum ofni. Leggið kökuna saman með kremi og smyrjið síðan súkkulaðibráð ofan á.

Krem:

150 g smjör, mjúkt

150 g flórsykur

3 vel þroskaðir bananar, stappaðir  

1 tsk. vanilludropar

Hrærið smjör og sykur saman þar til það er ljóst og kremkennt. Bætið banönum og vanilludropum út í og hrærið vel saman.

Súkkulaðibráð:

140 g súkkulaði

4 msk. rjómi

Bræðið súkkulaði og rjóma saman í vatnsbaði.