Vínarterta

Vínarterta er líklega sú kaka sem myndi vinna keppnina sem kaka íslandssögunnar. Þetta er kakan sem langamma bakaði í hlóðaofninum sínum, einn botn í einu og sauð sveskjumauk til að setja á milli. Ömmusystur mínar gerðu mjög góða vínartertu og hún var oft á borðum hjá þeim, þær báru gjarnan rjóma fram með henni.  Íslendingar sem fluttu til Canada um aldamótin 1900 tóku uppskriftina að þessari köku með sér þegar þeir námu land í Canada, í dag er þetta aðalkakan þar a.m.k. í Winnepeg.

240 g smjör, mjúkt

220 g sykur

2 egg

1 tsk. vanilludropar

520 g hveiti

1 ½ tsk. lyftiduft

½ dl mjólk

10 kardimommur, hýði tekið utan af og fræin steytt

Hrærið smjör og sykur saman þar til ljóst og kremkennt. Bætið eggjum og vanilludropum í og hrærið vel saman. Gott að setja eitt egg í einu og skafa með sleikju meðfram svo allt blandist vel saman. Sigtið hveiti og lyftiduft saman og bætið í ásamt mjólkinni. Hnoðið saman í samfellt deig.

Kælið deigið í ísskáp í 30 mín.

Hitið ofninn í 180°C (170°C á blástur)

Vigtið deigið og skiptið í 6 eða 7 hluta eftir því hvað þið viljið hafa mörg lög. Hér áður var kakan alltaf í 7 lögum. Notið örk af bökunarpappír til að fletja úr á og fletjið hvern deighluta út í 22-23 cm hring. Gott er að sáldra svolitlu hveiti á keflið og deigið svo vel gangi. Notið form eða disk og skerið utan af svo hver deigkaka verði nákvæmlega hringur. Hvolfið deigkökunum hverri fyrir sig á bút af bökunarpappír og setjið á bökunarplötu. Þið getið bakar tvær í einu ef þið eruð með blástursofn. Bökunartími er u.þ.bl. 12 mínútur, kökurnar eiga að vera ljósbrúnar og aðeins dekkri á jöðrunum. Kælið botnana og leggið síðan saman með sveskjumauki eða rabarbarasultu, þið þurfið 3 vel fullar matskeiðar á hvern botn. Kakan er best ef hún fær að standa í sólarhring vel pökkuð inn. Gott er að bera þeyttann rjóma með, hér áður fyrr var gjarnan sett lag af þeyttum rjóma ofan á kökuna.   

Sveskjumauk:

500 g þurrkaðar sveskjur

3 dl vatn

100 g sykur (eða eftir smekk)

¾ tsk. kanell

Sjóðið sveskjur í vatni í 15-20 mín eða þar til þær eru mjúkar. Maukið þær ásamt vatninu í matvinnsluvél ásamt sykri og kanil. Smakkið til með hvorutveggja, kannski má setja örlítið meira.