Sörur

40 stk.

Botnar:

3 eggjahvítur

200 g flórsykur

200 g möndlur, malaðar fínt

Hitið ofninn í 190°C (180°C á blástur). Þeytið eggjahvítur stífar, þ.e. að hægt sé að hvolfa skálinni og eggjahvítan dettur ekki úr henni. Passið að skálin sé tandurhrein, ef minnsta fita er í skálinni þeytast þær ekki vel. Blandið flórsykri og möndlum saman og hrærið varlega út í hvíturnar. Setjið smjörpappír á ofnplötur, mér finnst gott að bera matarolíu á plötuna, setja pappírinn á og bera aftur á pappírinn, þá festast kökurnar ekki við pappírinn. Setjið deigið á plötuna með tveim teskeiðum í litlar kökur, ágætt er að hafa þá eins og krónupening á stærð. Bakið kökurnar í 8-10 mín. Kælið.  

Krem:

¾ dl vatn

¾ dl sykur

3 eggjarauður

150 g smjör mjúkt

1 msk. kakó

Ofaná:

200 g súkkulaði, brætt við vægan hita

Sjóðið vatn og sykur saman í sýróp í nákvæmlega 5 mín. eftir að suðan er komin upp, ekki hræra í sykrinum.  Ef þið eruð með tvöfalda uppskrift (sem ég geri yfirleitt) þarf að bæta við tímann, 10-12 mín er passlegt. Setjið eggjarauður í skál og þeytið smá stund (1 mín). Hellið sýrópinu heitu út í rauðurnar í mjórri buni á meðan þið þeytið. Þeytið áfram þar til kremið er nær kalt, Þetta getur tekið 10-15 mín á meðalhraða. Það er mikilvægt að eggjablandan sé orðin köld annars bráðnar smörið þegar það fer út í og kremið verður eins og súpa. Þetta er það sem mistekst oftast hjá fólki við sörubakstur. Bætið smjöri út í smátt og smátt og hrærið vel á milli Sigtið kakó út í og blandið öllu vel saman. Má setja meira kakó, ágætt er að smakka til. Setjið kremið á kökurnar, kælið mjög vel. Dýfið kökunum í brætt súkkulaði einni í einu og kælið. Gott er að geyma sörur í frysti og setja í box með bökunarpappír milli laga. Þær geymast í 6 mánuði. Tips.  Ef kremið verður þunnt þ.e. ef þið hafið ekki kælt nóg er ráð að setja skálina í kæli góða stund og hræra upp aftur, kremið er ekki ónýtt.