Kúrenukökur - Nönnukökur

Mamma bakaði þessar alltaf fyrir jólin. Ég er nýlega farin að baka þær sjálf en ég týndi uppskriftinni og er nýbúin að finna hana aftur. Hitti vinkonu ömmu minnar hana Dísu rétt fyrir jól og í spjalli kom fram að hún var nýbúin að senda syni sínum fullan dunk af kúrenukökum til Noregs, sem eru hans uppáhald. Dísa sendi mér uppskriftina í framhaldi og sagði að þær væru kallaðar Nönnukökur af sumum. Þetta er mjög gömul uppskrift og undurgóðar kökur. 

70-80 stk.

375 g hveiti

250 g sykur

250 g kókoksmjöl

1 tsk. hjartarsalt

250 g smjör

2 egg

250 g kúrenur

Setjið þurrefnin í skál. Brytjið smjörið niður og myljið saman við smjörið. Þið getið gert þetta í hrærivélaskál með hræraranum. Bætið eggjum og kúrenum í og hnoðið saman í samfellt deig. Skiptið niður í þrjá til fjóra parta. Rúllað út í rúllur, kælt og skorið í þunnar sneiðar sem er raðað á bökunarplötu klædda bökunarpappír. Hiti 180°C og  bakað þar til ljósbrúnar, u.þ.bl. 8 mín.