Koníaksterta

Falleg og fínleg og var uppáhaldskaka pabba míns. Líklega fínlegt koníaksbragðið sem hefur heillað. Þessi er frekar lítil, líklega fyrir 8 en undurgóð á bragðið. 

200 g hnetukjarnar

120 g flórsykur

4 eggjahvítur

Á milli.

4 dl rjómi

1-2 msk. koníak

Ofan á:

150 g súkkulaði

1 msk. kakó

Byrjið á því að undirbúa 2 bökunarplötur með bökunarpappír. Teiknið 4 x20 cm hringi, tvo á hverja plötu, og berið olíu inn í hringina. Stillið ofninn á 180°C. Saxið hnetukjarnana meðalgróft og blandið saman við sykurinn. Gott er að gera þetta í matvinnsluvél og hakka þá með “pulse” stillingu svo hneturnar verði ekki of fínt hakkaðar. Þeytið eggjahvítur og blandið hnetublöndunni varlega saman við með sleikju. Skiptið deiginu á milli í hringina og breiðið það út í jafbt lag. Bakið þetta í 10-15 mín, í mínum ofni tekur 12 mínútur að baka þá. Klippið pappírinn í sundur á milli botnana svo auðvelt verði að losa þá og hvolfið þeim á örk af bökunarpappír, gott er að leggja rakann klút yfir botnana í 1 mínútu svo þeir losni auðveldlega. Þeytið rjómann og leggið botnana saman dreipið koníaki á botnana, magn eftir smekk, 1-2 msk. ætti að vera nóg. Bræðið súkkulaði í vatnsbaði. Leggið örk af álpappír á borðið og penslið með olíu. Hellið súkkulaðinu á og smyrjið því í þunnu lagi yfir pappírinn. setjið í ísskáp stutta stund og látið kólna. Skerið síðan með pitsuskera í ferninga. Skreytið kökuna með súkkulaðinu og dustið síðan yfir með kakó.