Konfektterta með marsípan og kókos

Hún lætur lítið yfir sér þessi kaka en leynir á sér. Botnarnir eru eins og konfekt og ostakremið með kókosnum passar vel við fínlegt marsípan bragðið. Þessi kaka er frábær sem eftirréttur með glasi af sætu hvítvíni eða líkjör. 

8 sneiðar

150 g marsípan (ren rá marsipan)

150 g smjör, mjúkt

120 g sykur

3 egg rifinn börkur af 1 sítrónu

50 g kókosmjöl

Hitið ofninn í 175°C. Setjið bökunarpappír á botninn á 2x kökuformum 18cm breiðum. Berið olíu eða smjör inn á hliðarnar. Rífið marsípan gróft niður og setjið í hrærivél ásamt smjöri og sykri. Hrærið vel saman. Bætið eggi út í, einu í einu og hrærið saman í samfellt deig. Bætið kókosmjöli og sítrónusafa í og blandið vel. Skiptið deiginu á milli í formin. Bakið þetta í 30 mín. Athugið að kakan lyftir sér mikið en fellur síðan saman í lok bökunartímans. Kælið botnana og takið síðan úr formunum. Hrærið kremið saman og leggið botnana saman með kremi og smyrjið síðan á alla kökuna, líka hliðarnar. Þekið kökuna með kókosflögum. Þetta er sannkölluð eftirréttakaka og er frábær með glasi af sætu hvítvíni.  

Sítrónuostakrem:

200 g rjómaostur

80 g flórsykur

safi af ½ sítrónu

Hrærið allt vel saman.

Ofan á: 50 g kókosflögur