Frönsk valhnetubaka með sveskjum og koníaki

Þeir sem þekkja mig vita að ég bjó nokkur á í París á mínum yngri árum. Þá var ég nýbúin með nám í matreiðslu og drakk í mig allt um franska matargerð og bakstur og hef verið með ástríðu fyrir henni allar götur síðan. Nú hef ég komið mér í það verkefni að gera upp lítið hús í þorpi í Suður-Frakklandi í héraði sem er þekkt m.a. fyrir armaníak, koníak, valhnetur og sveskjur. Hér er uppskrift að böku sem er frá Gascogne-héraði sem er rétt sunnan við þorpið sem ég bý í. Þar hella menn armaníaki yfir kökuna, það má nota það ef þið fáið það.

300 g sveskjur án steina

½ sítróna, safi af

Byrjið á því að setja sveskjur í skál og hellið heitu vatni og sítrónusafa svo fljóti yfir.

Bökudeig:

180 g hveiti

2 msk. flórsykur

100 g kalt smjör í bitum

3 msk.  ískalt vatn

1 eggjarauða

Útbúið bökuskelina. Sigtið hveitið  á borðið, bætið sykri í og saxið smjörið saman við með hníf. Gerið laut í hveitið og  setjið vatn og eggjarauðu þar í og hnoðið saman þar til vel samlagað (þetta má líka gera í skál). Pakkið deiginu í plastfilmu og geymið í ísskáp í 15 mín. Einnig má laga deigið í matvinnsluvél. Þá er allt nema vatn sett í vélina stillt á mesta hraða í ½ -1 mín, vatni bætt í og hrært saman aðra mín eða þar til deigið er vel samlagað. Þið getið notað aðra aðferð við að gera bökuskelina. Sjá bökudeig hér annarstaðar á blogginu. Geymið deigið 15 mín í ísskáp.

Fletjið deigið út á hveitistráðu borði svo passi í 25 cm bökuform upp með börmum. Setjið deigið í formið, geymið í ísskáp.

Fylling:

180 g smjör, mjúkt

180 g flórsykur

1 appelsína, fínt rifinn börkur af henni

3 egg, meðalstór

½ tsk. kanel

60 g hveiti

180 g valhnetur, malaðar

¾ dl koníak, hellt yfir í lokin

Hitið ofninn í 200°C (180°c  blástur). Hellið sveskjunum í sigti og látið drjúpa af þeim. Hrærið smjör, flórsykur og appelsínubörk vel saman. Bætið eggjum í einu í einu og hrærið vel. Bætið hveiti, kanel og valhnetum út í og blandið vel. Setjið fyllinguna í bökubotninn og raðið sveskjunum ofan á. Bakið bökuna í 35-40 mínútur. Hellið koníakinu ofan á kökuna. Sigtið flórsykur ofan á. Best nýbökuð með þeyttum rjóma.