Múrsteinar

Þessa dagana er ég að skoða gamlar uppskriftabækur frá mömmu. Mér fannst þessar kökur alltaf svo fallegar. Múrsteinar voru einar af mínum uppáhalds smákökum og ég á minningar um að borða fyrst kökuna allan hringinn og marensin síðast, namm ! Heyrði síðan af einni jafnöldru sem komst í kökudunkinn þegar hún var barn og át marensinn ofan af. Matur kallar oft fram skemmtilegar minningar.

250 g hveiti

½ tsk. hjartarsalt (má sleppa en það gerir kökurnar stökkar)

125 gr sykur

190 g smjör, kalt í teningum

1 eggjarauða

Setjið hveiti, hjartarsalt og sykur á borð eða í stóra skál. Myljið smjörið saman við með höndum eða í hrærivél þar til það er vel samlagað. Bætið eggjarauðu út í og hnoðið vel saman. Pakkið inn og geymið í kæliskáp í 30 mínútur. Hitið ofninn í 180°C. Setjið bökunarpappír á ofnplötu. Hrærið marensinn saman og setjið í sprautupoka ef þið eigið hann.  Skiptið deiginu í 4 hluta. Fletjið út einn hlut í einu með rúllukefli og stingið út litlar kökur ca. 5 cm í þvermál. Setjið marensdoppu á hverja köku annað hvort með sprautupoka eða tveim teskeiðum. Sáldrið svolitlu af möndlum og sykri ofan á hverja köku. Geymið afskurðinn og setjið saman síðast í eina deigkúlu síðast. Bakið kökurnar í 8-9 mín eða þar til þær eru gullnar og girnilegar. Úr uppskriftinni fást 60 kökur. 

Marens:

2 eggjahvítur

250 g flórsykur

Hrærið eggjahvítur og flórsykur saman í tandurhreinni skál þar til blandan er hvít og fallega stíf.

Ofan á:

50 gr. möndlur, saxaðar

10 sykurmolar malaðir gróft eða perlusykur