Kleinurnar hennar mömmu

Kleinur eru mjög stór partur af bakstursmenningu þjóðarinnar. Þær eru eitt af því fyrsta sem manni dettur í hug þegar talað er um íslenskt bakkelsi. Mamma notaði gjarnan nýmalaðar kardimommur í kökubakstur og þær gefa mjög gott bragð í kleinur. Uppskriftin gefur 70-80 kleinur.

1 kg hveiti

100 g sykur

6 tsk. lyftiduft

1 ½ -2 tsk. malaðar kardimommur, sigtið það grófasta frá

100 g smjör, kalt í litlum bitum

1 appelsína, börkur af henni (má sleppa)

1 sítróna, börkur af henni (má sleppa)

2 tsk vanilludropar

½ - 1 tsk. kardimommudropar

5 dl súrmjólk

2 egg

2-3 stk. Palmín til að steikja upp úr

Setjið hveiti sykur, lyftiduft og malaðar kardimommur í stóra skál og blandið saman. Myljið smjörið saman við. Sláið eggin saman í skál og bætið súrmjólkinni báðum tegundum af berki ef þið notið hann, vanilludropum og kardimommudropum saman við. Hellið súrmjólkurblöndunni út í þurrefnin og blandið saman með sleif. Setjið deigið á borðið og hnoðið saman í samfellt deig.

Skiptið deiginu í fjóra parta. Rúllið hvern part út, einn í einu, á hveitistráðu borði. Skerið deigið í ræmur með kleinujárni eða hníf í ca 5 cm lengjur og síðan í tígla. Safnið afskurðinum saman sér og rúllið út síðast. Gott er að taka frá nokkra deigbita frá til að prófa þegar þið athugið hvort feitin sé nógu heit. Skerið í miðjuna á hverjum bita með hníf og snúið síðan upp á svo verði kleina. Þið eigið að fá 70-80 kleinur úr uppskriftinni.

Hitið Palmín í stórum potti . Steikið kleinurnar í heitri feitinni, það er gott að nota prjón eða eitthvað slíkt áhald til að snúa kleinunum á meðan á steikingu stendur til að fá jafna steikingu.

Setjið nýsteiktar kleinur á eldhúspappír svo drjúpi sem mest af feitinni af þeim. Kleinur eru bestar nýsteiktar en mjög gott er að frysta þær strax, taka út eftir þörfum og hita í 8-10 mín. í 100°C heitum ofni.

# Mér finnst ómissandi að nota nýmalaðar kardimommur. Ég mala þær í kaffikvörn en það er líka gott að nota lítinn nutribullet.

# Gott er að nota víðan og djúpan pott svo vel fari um kleinurnar í steikingunni. Potturinn minn er 6 lítra og ég nota 3 stykki af Palmíni í þessa uppskrift. Ef þið eruð með minni pott duga 2 stykki.

# Kaffikvörn er þarfaþing þegar mala á kryddblöndur í matargerð eða kardimommur eins og hér.