Vanillukransar

Smákökur æsku minnar. Dásamlegt smjörbragð og minningar um að baka með mömmu, taka á móti lengjunum úr hakkavélinni og setja saman í kransa og setja á bökunarplötuna. Þetta eru jólin fyrir mér. 

250 g hveiti

125 g flórsykur

100 g afhýddar möndlur, malaðar fínt

1 vanillustöng

2-3 tsk. vanillusykur

250 g kalt smjör, skorið í litla bita

Skerið vanillustöngina í tvennt eftir endilöngu og skafið kornin innan úr. Stöngina getið þið þurrkað, blandað síðan saman við sykur og malað fínt og notað seinna. Blandið saman hveiti, flórsykri, möluðum möndlum, kornum úr vanillustöng og vanillusykri. Myljið smjörið saman við deigið með höndunum eða í hrærivél með hrærara. Hnoðið deigið þar til það er sprungulaust, pakkið í plastpoka og kælið það í klukkutíma. Hitið ofninn í 185°C. Leggið bökunarpappír á tvær bökunarplötur. Sprautið lengjur með stjörnumunstrinu á hakkavélinni og skerið eða klípið það í lengjur. Formið kransa og raðið á bökunarplötuna, þær renna nær ekkert út þannig að það má raða nokkuð þétt. Ef þið eigið ekki hakkavél er líka hægt að rúlla deigið út í mjóar lengjur, festa saman í litla kransa og setja á plötuna. Bakið í 8 mín eða þar til fallega gullnir á litinn.